Controllas
Nouva prescripziun a reguard l'installaziun Electrica da tensiun bassa (NIV)
Süls 1. schner 2002 ha il Cussagl federal miss la nouva prescripziun a reguard l’installaziun electrica da tensiun bassa (NIV) in vigur. Quista vaglia per installaziuns da tensiun da müdamaint fin 1000V resp. üna tensiun eguala da 1500V. Installaziuns electricas da tensiun bassa ston gnir controlladas. Quai sto esser al principi da l’installaziun sco eir periodicamaing.
Il possessur svessa es respunsabel per la realisaziun da talas controllas.
Il register actual da las dittas chi fan controllas po gnir retrat pro l’inspectorat federal, 8320 Fehraltorf o suot www.esti.ch.
Controlla d'installaziun
Davent da schner 2002 es El sco proprietari da chasa respunsabel, da dar giò la cumprova da sgürezza da las installaziuns electricas da Sia chasa. Tala vain dumandada dal manader da gestiun da la rait electrica. L’invid per far la controlla da sgürezza vain tramiss dal cusgliader da sgürezza e quai ses mais avant la scadenza da la controlla. In Engiadina Bassa es la EE-Energia Engiadina incumbenzada per quista lezcha. In Engiadin’Ota, il Partens ed il Grischun signuradi la Rätia Energie AG. Quels retschaivan eir las cumprovas da sgürezza.
Installaziuns electricas da tensiun bassa ston gnir controlladas cur chi sun gnüdas construidas e lura periodicamaing. Nouv es il proprietari da las installaziuns respunsabel, cha las controllas gnian manadas tras. Il manader da la rait supplichescha da protrametter la cumprova da sgürezza, cha l’installaziun vain fabrichada e mantgnüda tenor las reglas da la tecnica. A man dal cumond sto il proprietari da la chasa incumbenzar ad ün specialist chi fa las controllas da sias installaziuns. Cur cha quel confermescha il bun stadi da las installaziuns, schi po gnir dat giò la cumprova da sgürezza bsögnaivla. In avegnir pisseran il manader da la rait ed il inspectorat federal chi gnian fattas las controllas tras il proprietari e fan be in cas excepziunals svess controllas. A reguard las controllas d’installaziuns es la nouva prescripziun ün müdamaint invers la pratica d’infin uossa. Quai pertocka specialmaing als proprietaris d’installaziuns. In avegnir nu pon els as laschar sül fat, cha las controllas gnian fattas dal manader da la rait. Els svessa ston gnir activs. Da tschella vart pon els far quint cun agüd dals controllörs electricists. Quels specialists stan a reguard la sgürezza per la controlla d’installaziun a disposiziun.
Glista da controlla per proprietaris
Co vain fatta la cumprova da sgürezza ?
- Il manader da la rait (EE) pretenda chal proprietari lascha controllar sias installaziuns electricas e cha la cumprova da sgürezza gnia prestada. Tenor la ledscha NIV 2001 sto quai capitar infra 6 mais.
- Il proprietari incumbenzescha ad üna ditta neutrala per far las controllas necessarias. (Quel chi ha però planisà, installà o mantgnü l’installaziun nu po gnir incumbenzà culla controlla)
- Cun defet: il proprietari incumbenzescha a seis electricist da reparar ils defets constatats.
Sainza defet: La ditta da controlla protrametta la cumprova da sgürezza. - Sun ils defets reparats, surdà la ditta da controlla la cumprova da sgürezza al proprietari.
- Il proprietari protrametta üna copcha da la cumprova da sgürezza al manader da la rait (EE).
- La cumprova da sgürezza sto gnir tgnüda sü almain fin pro la prossma controlla periodica. Quai es lavur dal proprietari.
Controllas periodicas tenor NIV
Fabricats d’abitar: 20 ons
Commerzi e paurarias: 10 ons
Butias, kioscs, büros, garaschas da parcar: 10 ons
Hotels, pensiuns e restorants: 5 ons
Chasas da scoula, bogns cuverts e sarineras: 5 ons
Documentaziuns d'indriz e respunsabiltà
Il proprietari d’installaziuns es oblià, da tgnair sü las documentaziuns tecnicas (schemas, plans, instrucziuns eui.) Talas sun gnüdas fattas dal fabricant o il planisader e vaglian per tuot la dürada d’installaziun. La cumprova da sgürezza sto esser avantman. Quai veglia almain per üna perioda da controlla. Il proprietari d’installaziuns es tenor artichel 58 dal dret d’obligaziun respunsabel per ils dons chaschunats.
Ledscha e prescripziuns
- Ledscha d’electricità (EleG) dals 24 gün 1902
- Prescripziun d’installaziun da tensiun bassa (NIV) dals 7 november 2001
