La rait da l'Energia Engiadina es structurada tras differents elemaints da rait ed implants chi garantischan in lur totalità ün provedimaint d'energia sgür ed efficiaint.

 Ün elemaint essenzial es il trassé da l'implant da büschens per tensiun media (NE5) e bassa (NE7) cun üna lunghezza totala da 333 km. Quai cumpiglia pro la rait da media tensiun cabels cun üna lunghezza da 141 km sco eir la rait da bassa tensiun cun 115 km. Implü existan i'l sectur da tensiun bassa cabels d'attach a chasa cun üna lunghezza totala da ca. 140 km. Il nomer da lingias al liber chi sun amo in funcziun as diminuischa on per on e vain rimplazzà da lingias suotterranas. Hoz sun in acziun i'l territori da la rait da l'EE amo 7,9 km lingias libras da tensiun media e 0,7 km lingias libras da tensiun bassa (NE7).

Per pudair transportar l'energia in möd sgür e fidà in tuot las chasadas da Martina fin a Susch faja dabsögn dasper ils indrizs da büschens e cabels amo oters elemaints.

Per quai sun in acziun pro la tensiun media ulteriurs 428 champs da commutaziun, 161 transfuormaturs transfuorman la tensiun media sün la tensiun bassa necessaria pels cliaints finals e 225 cabinas da distribuziun pisseran per üna distribuziun fina illas vias e quartiers.

La prestaziun totala da tuot ils transfuormaturs s'amunta a 93,5 MW ingio ch'üna prestaziun maximala simultana i'l territori da la rait da l'EE es pro ca. 20 MW.

D'importanza centrala per la gestiun da la rait sun ils puncts da masüraziun. In tuot daja 6'987 puncts da masüraziun, inclus masüraziuns da gestiun. Da quels sun ca. 2'000 puncts da masüraziun smart meters intelligiaints, ils quals vegnan amplifichats amo plü inavant i'ls prossems ons.

Cun quai as muossa cha la rait da l'Energia Engiadina consista d'üna cumbinaziun da lingias da büschens, cabels, lingias al liber, champs da cumond e staziuns da trafo, cumplettadas d'ün sistem da masüraziun cumplessiv. Quista structura garantischa ün provedimaint d'energia stabil e confuorm a las reglas illa regiun Engiadina Bassa.