Concept directiv da l'interpraisa

L'EE-Energia Engiadina es gnüda fuondada als 1. gün 2001. L'interpraisa s'ha
fuormada our da la privatisaziun da l'Impraisa electrica Scuol.

Las incumbenzas principalas sun:

• La furniziun sainza interrupziun d'energia electrica a tuot ils cliaints.
• La producziun sgüra d'energia electrica cun forza idraulica indigena.
• L'economisaziun da l'energia da concessiun dals cumüns.
• Garanzia, acquisiziun ed economisaziun da l'energia supplementara.
• Il scumpart effiziaint da l'energia electrica (tensiun ota e bassa) cun cabels e lingias
  libras, centralas secundaras, staziuns da transfuormaziun, cabinas da scumpart eui.
• Servezzans per ün provedimaint sgür cun energia electrica incl. inglüminaziun da las
  vias i'ls cumüns da l'Engiadina Bassa: realisaziun d'implants nouvs, gestiun e
  mantegnimaint, survaglianza da las ouvras idraulicas cun aua da baiver eui.
• Garantir l'inglüminaziun publica aint ils cumüns.

EE-ENERGIA ENGIADINA
Bagnera 171
CH-7550 Scuol
tel. 081 861 23 00
fax 081 861 23 01
ee-energia-engiadina@bluewin.ch

Nossas cumpetenzas sun:

L'affar d'energia:
Sün livel regiunal. No eschan flexibels, cumpetents in basa a noss'experienza da blers ons, e svelts.

La producziun da forza idraulica:
No eschan persvas cha la forza idraulica ha ün avegnir e promovain il princip da la persistenza.

Il scumpart da forz'electrica:
In prüma lingia illa regiun tradiziunala Engiadina Bassa, sur l'aigna rait o sur raits ingio cha no vain
drets da transport.

Servezzans:
In connex cun nossas activitats centralas, sül chomp tecnic o commercial.

1. Böt, intent e realisaziun

1.1
Nos böt es da furnir energia electrica sgüra a tuot noss cliaints.

1.2
No accumplin ils bsögns dal marchà sül chomp "provedimaint d'energia" in
Engiadina Bassa culla cusglianza e'ls servezzans necessaris. Quai cumpiglia
tuot ils pass tanter eruir ed accumplir ils bsögns.

1.3
No spordschain sco prestaziun dal marchà servezzans economics d'ota qualità
sün ün livel da predschs correspundents.

1.4
No considerain üna pusiziun predominanta sül marchà illa regiun Engiadina
Bassa sco factur essenzial per sgürar noss' existenza. No'ns acquistain e
sgürain quista pusiziun cun nossa politica da marketing activa cul böt da trar a
nüz optimalmaing il marchà.

1.5
No eschan activs sün chomp local e regiunal. Sco interpraisa importanta per
l'economia publica da l'Engiadina Bassa vezzaina la necessità da s-chaffir e da
sviluppar in möd adequat ils potenzials dal marketing, da la furniziun da
servezzans, dal svilup da las sportas, dal management e da l'organisaziun.

1.6
No stuvain manar l'interpraisa optimalmaing tenor princips economics. Quai
ans permetta da garantir a lunga vista l'existenza e'l svilup da l'interpraisa. I'ns
es però eir consciaint cha no vain da resguardar eir nossa respunsabiltà
cumplessiva per l'economia publica locala e regiunala.

1.7
Nossa libertà d'agir e da decider ha adüna prüma priorità pro tuot quai chi
capita aint ill'interpraisa.

2. Publicità e partenaris

2.1
No lain ragiundscher üna buna collavuraziun cun tuot noss partenaris privats e
cun noss partenaris e las instanzas dal man public.

2.2
In tuot nossas relaziuns commercialas laina cultivar ün cumportamaint onest ed
equilibrà cun relaziuns stablas a lunga dürada.

2.3
Sco interpraisa domiciliada in Engiadina resguardaina cun nossas incumben-
zas scha pussibel l'economia locala, premiss cha no chattain cundiziuns chi
pon concuorrer in ün'economia libra. Cul böt da survgnir cundiziuns favuraivlas
trattaina cun consequenza, però correctamaing.

2.4
Cun nossas ouvras vaschinas cultivaina üna collavuraziun effectiva e con-
structiva.

3. Ambiaint

3.1
Pro tuot nossas activitats laina mantgnair ed amegldrar las cundiziuns ecologi-
cas.

3.2
No resguardain pro noss'actività cha nossas ressursas natüralas stettan a
disposiziun be in quantitats limitadas. No sustgnain activmaing la protecziun da
l'ambiaint e pigliain masüras correspundentas eir sainza prescripziuns davart
las autoritats.

3.3
Sco ütilisaders da la forza idraulica (l'energia regenerabla la plü ecologica)
savaina quant important ch'ün ambiaint intact es. No'ns sentin perquai obliats
d'ir intuorn cun respunsabiltà cullas ressursas natüralas e congualain pro
nossas activitats conscienziusamaing ils interess da la protecziun da la natüra
e cuntrada culs interess da l'economia privata e publica.

4. Collavuraturas e collavuratuors

4.1
La concordanza effectiva da tuot las collavuraturas e tuot ils collavuratuors es
üna da las premissas las plü importantas pel success da l'interpraisa. No
promovain perquai consciaintamaing la collavuraziun in ün'ambiaint da sincerità
e d'incletta vicendaivla. Mincha collavuratura e mincha collavuratur dess
s'ingaschar activmaing aint ill'interpraisa.

4.2
I'l rom da nossas pussibiltats laina promouver il svilup persunal e professiunal
da nossas collavuraturas e noss collavuratuors. Cun tillas/tils integrar
activmaing illa gestiun provaina da s-chaffir ün bun clima da lavur chi motive-
scha.

4.3
Las collavuraturas e'ls collavuratuors dessan pudair as sviluppar cun lur in-
gaschamaint persunal: No resguardain cun dar incumbenzas lur interess, lur
cugnuschentschas ed abiltats e sustgnain lur svilup scha pussibel cun schlargiar
lur respunsabiltà, cun scoulaziun e cuors da perfecziunamaint. Lapro laina
spordscher las listessas pussibiltats a tuot las collavuraturas e tuot ils
collavuratuors.

4.4
No spettain da nossas collavuraturas e noss collavuratuors ün'ota qualificaziun
professiunala e persunala ed üna prestaziun correspundenta. No lain pajar a
nossas collavuraturas e noss collavuratuors salaris adequats chi cor-
respuondan a las grondas pretaisas e la prestaziun. No tillas/tils lain proteger
cun instituziuns da prevenziun adattadas.

4.5
No savain cha'l success da noss'interpraisa dependa decisivmaing dal cader e
da noss specialists. No pretendain perquai da quellas persunas specialmaing
l'identificaziun cumpletta culla politica e'ls böts da l'interpraisa, forza innovativa,
flexibilità sco eir ün cumportamaint da manader cooperativ, economic ed
exemplaric.

4.6
No arcugnuschain nossa respunsabiltà sociala invers nossas collavuraturas e
noss collavuratuors, suottastrichain però eir lur respunsabiltà sociala persunala.

4.7
Sgürezza da lavur e protecziun da la sandà

4.7.1
Cundiziuns sgüras dal lö da lavur e chi promouveschan la sandà sco eir
masüras ingio cha no integrain eir tuot il persunal, cliaints e dittas estras
mainan ad ün process da megldramaint permanent, chi resulta eir sün nossa
qualità da servezzan e prodots.

4.7.2
Sgürezza da lavur e protecziun da la sandà sül lö da lavur es ün möd da manar
essenzial. Ils superiurs praticheschan üna funcziun exemplarica invers ils
lavuraints. Sgürezza da lavur e protecziun da la sandà pretenda da tuottas
collavuraturas e tuots collavuratuors ün agir consciaint e cun sen da
respunsabiltà.

4.7.3
In intervals periodics fixaina ils böts ed il program da sgürezza da lavur. Per
sgürar il success da la sgürezza da lavur e la protecziun da la sandà in nossa
ditta, organisaina regularmaing tschantadas a reguard quel tema. Uschè
controllaina l'effet da nossa politica e da las massüras da sgürezza da lavur e
garantin d'accumplir las pretaisas giuridicas.

4.7.4
Pro la planisaziun e l'introducziun da nouvas incumbenzas tschernaina talas,
chi sun tenor experienza ed il stadi da la tecnica praticablas e chi
correspuondan a las relaziuns da nossa ditta. Sur da masüras e progets
adequats vegan fattas cuntinuadamaing meglioraziuns a reguard la sgürezza
da lavur.

4.7.5
Il böt principal es l'oblig etic e moralic, da proteger a tuot ils collavuratuors e
tuottas collavuraturas da dons corporals tras accidaints, malatias da lavur e
problems da sandà sül lö da lavur.

4.7.6
No lain redüer las uras d'absenza causadas tras accidaints, malatia e
problems da sandà sül lö da lavur sün ün minimum, per ragiundscher ün
process da lavur economic, efficiaint e sainza disturbis.

5. Infuormaziuns

5.1
No lain infuormar in möd opportun a nossas collavuraturas e noss collavura-
tuors, noss proprietaris sco eir la publicità davart noss'actività.

5.2
Mincha collavuratura e mincha collavuratur survain quellas infuormaziuns ch'el
douvra per accumplir sia incumbenza e per verer il connex da tala cun tuot
l'interpraisa.

6. Organisaziun

6.1
No s-chaffin ün'organisaziun efficiainta cun sectuors d'incumbenzas survisibels,
cun cumpetenzas e respunsabiltats definadas cleramaing, chi s'adatta in möd
flexibel a pretaisas chi's müdan.

6.2
L'organisaziun da noss'interpraisa as basa sün:

• la structuraziun da l'actività commerciala tenor sportas da servezzans e
  categorias da cliaints cun fuormar centers da profit,
• la cumbinaziun d'activitats chi pon gnir elavuradas centralmaing il plü effici-
  aint, cun fuormar 'funcziuns centralas' e spartas.

6.3
No mettain böts per l'interpraisa, drizzain nos agir sün quels e pisserain per
process da lavur raziunals ed efficiaints fond adöver d'instrumaints e sistems
directivs efficiaints.

6.4
Decisiuns davart structuras e dumondas operativas a lunga vista da l'inter-
praisa elavuraina colleghialmaing. Pro dumondas operativas a cuorta vista e
fats dispositivs pon decider singuls.

7. Marca

PurePower Graubünden, üna marca da la Rätia Energie

Daspö il principi 2002 vain offri PurePower Graubünden, üna marca da forz'electrica da
la Rätia Energie, eir als cliaints da l'EE-Energia Engiadina in Engiadina Bassa. Pure-
Power Graubünden es forza idraulica prodotta ecologicamaing illas muntognas
Grischunas. Sper las ouvras electricas Palü e Cavaglia illa Valposchiavo vain Pure-
Power Graubünden uossa eir prodot cullas tschinch ouvras idraulicas cun aua da baiver
in Engiadina Bassa (chi portan il certificat "naturemade star") e cul indriz da biogas
Grass a Zernez.

Uschè han las consümentas e'ls consüments da forz'electrica in Engiadina Bassa la
pussibiltà da retrar PurePower Graubünden directamaing da lur regiun. Culla cumprita
da PurePower Graubünden praistan cliaintas e cliaints üna contribuziun importanta per
üna producziun da forz'electrica adattada a l'ambiaint: ca. 2 raps per ura kilowatt
vegnan investits directamaing illa promoziun da forz'electrica prodotta cun energia
solara, vent o substanza biologica. 1 rap riva aint in ün fondo ecologic chi vain dovrà per
la realisaziun da masüras ecologicas aint illa regiun dals implants da producziun.

8. Revisiun

Il concept vain revis minch'on ed adattà tenor bsögn.

Scuol, november 2004